पिंपरी प्रतिनिधी:-
महाराष्ट्रातील दोन विधानसभा जागांसाठी पोटनिवडणूकीचा कार्यक्रम जाहीर झाला आहे. कसबापेठ मतदारसंघाच्या भाजप आमदार मुक्ता टिळक आणि चिंचवडचे भाजपचे आमदार लक्ष्मण जगताप यांच्या निधनानंतर ही पोटनिवडणूक केंद्रीय निवडणूक आयोगाने जाहीर केली आहे. यात चिंचवडच्या पोटनिवडणुकीची चर्चा मात्र सर्वाधिक रंगली आहे.
रावेत येथील माजी नगरसेवक मोरेश्वर भोंडवे यांच्या नावाची नागरिकांमधून आणि राजकीय वर्तुळात मोठी चर्चा सुरु आहे. गेली अनेक वर्षांचा राजकीय अनुभव असणारे मोरेश्वर भोंडवे हे दोनदा नगरसेवक आहेत. २०१२ आणि २०१७ ला राष्ट्रवादीच्या तिकीटावर नगरसेवक म्हणून निवडून आले आहेत.
२०१९ च्या निवडणूकीत दिवंगत लक्ष्मण जगताप ( भाजप ) यांच्या विरोधात सर्व पक्षीयांनी अपक्ष उमेदवार राहुल कलाटे यांना पाठिंबा देत रावेत, किवळे या भागातून सर्वात जास्त मते मोरेश्वर भोंडवे यांनी मिळवून दिली होती. भाजपची लाट असतानाही अपक्ष उमेदवाराला त्यांच्या प्रभागातून सर्वाधिक मतदान मिळवून देण्यात भोंडवे यांचा मोलाचा वाटा आहे. त्यामुळे राजकीय वर्तुळात मोरेश्वर भोंडवे यांच्या नावाची चांगलीच चर्चा होत आहे. याआधी सुद्धा चिंचवड विधानसभा निवडणुक त्यांनी लढवली आहे. त्यामुळे तो अनुभवही त्यांच्या गाठीशी आहे. मोरेश्वर भोंडवे हे राष्ट्रवादीकडून चिंचवड विधानसभा पोटनिवडणुकीसाठी तीव्र इच्छुक असून त्यांच्या नावाची जोरदार चर्चा आहे. जनतेशी असणारा थेट संपर्क आणि विविध उपक्रमातून सामाजिक बांधिलकी जोपासणारे अनुभवी नेते अशी त्यांची ओळख आहे. त्यामुळे या पोटनिवडणुकीत राष्ट्रवादी काँग्रेस पक्षाकडून मोरेश्वर भोंडवे यांच्या नावाचीच वर्णी लागण्याची दाट शक्यता दिसत आहे.
